اليوم الثاني عشر

في كل مره يحتاج ابني الحمام اساعده اسحب معه الجهاز وأقف عند الباب اراقبه ،في كل مرة يقول لي احس اني دايخ تعبان اساعدة وامسك يدينه حتى يقضي حاجته ويرجع وكنت احس اني قوية لكن اليوم حسيت اني اضعف انسان على وجه الارض لما قام بيروح للحمام قال احس اني دايخ احسبها مثل كل مره باسنده ويخلص ويطلع بس حدث اللي ما توقعته واغمي عليه فجأه وطاح الجهاز على ظهري كل شي حصل فجأه حاولت ارفعه ماقدرت والجهاز طايح واخاف تنسحب الانابيب من صدره وازرار الانذار بعيده جتني قوه ورفعته لكن رجع طاح في مكان ثاني في الحمام في هذي الساعه طلعت من الغرفة انادي بصوت عالي help help

جو الممرضات يركضون شالوه بعد معاناة لانه طويل وجسمه كبير ،ابعدوني عنه حسيت بالضعف وقلة الحيلة وانا اشوفه كدمات في وجهه وخشمه وانا ما قدرت انتبه له ،خذلتك يا ابني انا اسفه لكني ماقدرت وخارت قواي ... اكتب لكم بعد مرور ثلاث ساعات من هذا الموقف المريع احس الدم نشف من عروقي اراقبه وهو ينام الله يجعلها نومة العافيه و الله لا يعيده من موقف